Fasting In Lebanon
<p-color-red>مرحبا للجميع<p-color-red>! حديثنا اليوم هو عن الصوم, لانو شهر نيسان هالسنة وحّد اللبنانيين، باعتبارو كان شهر الصيام للكل.
فهو جمع بين شهر رمضان عند المسلمين و الفصح عند المسيحيين.
بكلّ الاديان، الصيام هو نوع من الفضيلة بيتقرّب فيها الانسان من ربو متل الصدقة، الصلى و غيرهن من الطرق يلي بتدلّ على محبتو الله.
بما انو اتفقت كل الاديان على تعريف الصيام و دلالتو، خلينا نبلش نحكي اكتر على أسلوب صيام المسيحيين بلبنان و شو الفكرة منو.
بصومو المسيحيين ٤٠ يوم متواصلين <p-color-red>كرمال هيك<p-color-red> بيتسمّى صومهن بالصوم الاربعيني المسيحي او الانقطاع المقدّس.
وفكرة الصيام عند المسيحيين، هو الابتعاد عن الاكل بحبو او اتعودوا تكراره بشكل يومي متل القهوة، الشوكولا، الدخان و غيرهن اكيد من الشغلات بتتمارس بشكل يومي و هيك بكون درّب نفسه الشخص ما يترك هالشغلات تسيطر عليه.
-ببلّش الصيام الاربعيني نهار أربعا يسمى أربعا الرماد، و بينصام ٤٠ يوم متواصلين، و المسيحي بصوم خلالن عن الاكل و الماي اقلها ١٢ ساعة باليوم و ممكن طبعاً يضل صايم وقت اكتر.
وبس يخلصوا هال ١٢ ساعة، بيقدر الشخص الصايم ياكل وجبة وحدة باليوم و الفطور بكون شي جدا خفيف مثلاً الراهبات او الاشخاص المتديينين اكتر، وجبتهن بتكون ماي و شقفة خبز.
اما بالنسبة لطريقة الصيام،
ففي ناس بتصوم ٤٠ يوم كاملين بالانقطاع عن اللحوم، الدجاج او اي اكل حيواني و كمان بالابتعاد عن مشتقات الحليب متل الجبنة اللبنة الزبدة البيض و غيرهن..
و <p-color-red>في ناس تانية<p-color-red> بتقرر تصوم على الاكل يلي بتحبو لانو مثلاً اذا شخص ما بحب اللحمة و ما بياكل منها بإيامو العادية، ما رح يستفيد شي اذا صام عنها <p-color-red>بهول<p-color-red> ٤٠ يوم و ما رح يحس بقيمة الصيام <p-color-red>كرمال هيك<p-color-red> مثلاً في ينقطع عن المربى اذا كان بياكل منها يومياً حتى لو كانت اكل فيغان و مش حيواني.
و كمان في ناس بكون الصيام عندهن عن العادات السيئة مثلاً العصبية، الخناق مع الناس، المسبات، عدم الاهتمام بصحتهن. فالصوم الاربعيني هي فترة من السنة بغيّر فيها الانسان نمط حياتو المادية كرمال يتعرّف أكتر على قيمة حياتو الروحية و هالشي ما بيكتمل بس بالصيام اذا ما ترافق معو الصدقة و الصلاة كمان و هيك بتنفتح ابواب التوبة و الرحمة و طلب الغفران, كرمال يختبر الانسان نفسو و يقدر يغير حياتو للافضل.
و بس يخلصو هال٤٠ يوم صيام، وينجح الانسان بتحدي الضعف <p-color-red>جواتو<p-color-red> و يتخلص منو، بكون وصل الى قمة الصوم وهو الاسبوع الاخير المقدس لما الانسان برافق المسيح حتى قيامتو، وساعتها بيحتفل بعيد الفصح او
.easter متل ما منسمي هون بلبنان
أما بخصوص شهر رمضان عند المسلمين، ف بيفرض هالشهر المبارك هيبته و رهجتو كل سنة, بتوقيت مختلف على حسب التقويم الهجري.
بيتميّز شهر رمضان انو الشهر يلي أُنزل فيه القرآن الكريم و ايضاً بهالشهر نزلت الكثير من الكتب السماوية.
بيجي رمضان سنوياً كرمال المسلم يصوم و يتقرب من ربو، و طبعاً هالركن ما بيكمل بلا ما يلتزم الشخص معو بالصلاة، الذكاة، الالتزام باللباس المحتشم و العمرة طبعاً لمن استطاع اليه سبيلا.
فبحسب الدين الاسلامي، بيساعد الصوم الانسان انو يتحلّى بالصبر و بمكارم الاخلاق و كمان بهالشهر بيستفيد جسم الانسان و خصوصاً جهازو الهضمي، زيادة عن انو الصوم بيعتبر وسيلة لشكر الله عن النعم يلي بيملكها بالايام العادية.
فعند الاسلام، طريقة الصيام بتكون بالابتعاد عن الاكل و الشرب و الجماع، من الفجر حتى المغرب و كمان الابتعاد عن كل شي حرمه الله، و بتهواه نفسه، كرمال يقلل من اخطاءه و ذنوبه وشهواته. <p-color-red>فهيدا<p-color-red> الشهر بساعد على الزهد في الدنيا و التركيز اكتر على الآخرة.
و هلق رح خبركن اكتر كيف بصير الصيام عند المسلمين خلال هالشهر.
بيتسحرّوا قبل اذان الفجر و بيفطروا ما لاذ و طاب بعد آذان المغرب ومنهن مرغومين انهن ينحرموا من ولا اكلة طالما تعتبر حلال اكلها بالدين الاسلامي
و طبعاً لازم يكون عندهن نية الصيام قبل بليلة و بصومو من طلوع الفجر لتغيب الشمس لمدة ٣٠ يوم، يعني بصومو قريب ١٦ ساعة باليوم.
بالعادة بتشتهر السفر الرمضانية بالتمر لكسر الصيام فيها مع الماي. و كمان سلطة و شوربة و مقبلات مع طبق رئيسي بتستحلي العين قبل البطن. بالاضافة الى الحلو الرمضاني من حلاوة جبن، مد بقشطة، داعوقية، شعيبيات، زنود الست و كلاج الموسم.
و طبعاً ما فيني انسى الشوارع المزينة بالقناديل الملونة عم ترحب برمضان الشهر الفضيل و الكم الهائل من المسلسلات الرمضانية يلّي بتتصوّر كل سنة ع ٣٠ حلقة و بتنعرض عكلّ المحطات اللبنانية ل ٣٠ يوم.
و بس يخلصو هال ٣٠ يوم، و يبيّن الهلال بالسما، بيعلنو المراجع الدينية نهاية شهر رمضان وحلول عيد الفطر. وبيحتفلو المسلمين بهالعيد عن طريق الزيارات العائلية، شراء التياب، الروحة عالملاهي و<p-color-red>الضهرات<p-color-red>.
اهلا اهلا يا هلال
بس لا اهلا و لا سهلا بغلا الاسعار يلي مرافق شهر الصيام هالسنة. فرمضان السنة غير السنين مرقوا قبل لانو عم يكون صعب عاللبنانين خاصة بعد الازمة الاقتصادية، مثلاً صحن الفتوش يلي بيعتبر اساسي على سفرة الفطور صار بكلّف قريب ٧٠ ألف.
و من العادات كمان منشوفها برمضان هيي لمّة العيلة و جمعتها سوى على سفرة الافطار يلي قليل ما شفناها هالسنة بسبب الغلا المعيشي و شغل رب العيلة لساعات طويلة ليأمن اكل لعيلتو.
ومن الطبيعي كمان نشوف المطاعم نوعاً ما فاضية اذا تكلفة الشخص الواحد بيتراوح بين ٢٥٠ و ٥٠٠ ألف، يعني معاش رب العيلة لشهر كامل بيندفع بيوم واحد اذا حب يفطر هو و عيلتو بمطعم.
و أخيراً بلبنان، البلد يلي بتعيش فيه <p-color-red>طوايف<p-color-red> و <p-color-red>مذاهب<p-color-red> كتيرة، بضل يلّي بيجمع اللبنانيين، مسلمين و مسيحيين اكبر بكتير من بيفرقهن.
و متل ما شفنا، أوصت الديانات كلها بالصوم كفعل عبادة للرب، فمجرد اختلاف بالعقيدة ما بيعني الخلاف.
واللبنانين بيعرفوا انو اسمى ما بيجمعهم قبل اللغة و الهوية هو الانسانية. ف ما تستغربوا اذا شفتو مسيحي قاعد مع مسلم على سفرة الافطار بلبنان، لانو بقاموس الوحدة و العيش المشترك، ما في فرق بين صوت آذان طالع من الجامع او جرس عم يرنّ بالكنيسة.
<p-color-red>فينال<p-color-red>: أدان جامع مع جرس الكنيسة.
There Are Other People
في ناس تانية
Because of this
كرمال هيك
Hello Everybody
مرحبا للجميع
