Hamra Street
اذا جيتوا علبنان وما زرتوا شارع الحمرا، يعني ما زرتو بيروت بعد.
فصورة لبنان الحلوة و تشبيهو بسويسرا الشرق ما <p-color-red>بتكمل<p-color-red> الا بشوارعو القديمة و خاصة شارع الحمرا.
تعوا سوا نتعرف اكتر عقصة هالشارع.
بيتواجد شارع الحمرا بقلب العاصمة اللبنانية بيروت.
و هو بيعتبر اهم شارع فيها نظراً لقيمتو التاريخية و موقعو الجغرافي المهم لانّو بيمتدّ من شرق المدينة لغربها.
طول الشارع ١٣٠٠متر و عرضو ٨ امتار يعني <p-color-red>بالكاد<p-color-red> بيتسع لسيارة وحدة و ممكن تمشيه من اولو لآخرو ب ١٠ دقايق بس. هالشارع مبلّط بنوع من الحجار الاسود الشبيه بشوارع باريس التاريخية.
فهو قريب من البحر بمسافة ١٥ دقيقة مشي وأغلب الاوقات بكون في زحمة ناس و عجقة سيارات، و هالشي عطاه لقب الشارع يلي ما بنام، بسب حيويته الدايمة ليل ونهار
بيُعتبر هالشارع من أهم مظاهر السياحة ببيروت وبيقصدوه السُيّاح من مُختلف أنحاء العالم بسبب التنوّع الموجود فيه. بيلتقى فيه الاوتيلات، البيوت، <p-color-red>الكافيهات<p-color-red>، المسارح، السينما، المصارف، المحلات ومراكز التسوق. يعني <p-color-red>فيكن<p-color-red> تقولو انو شارع شامل، وبيلتقى في كل شي بدكن ياه أو <p-color-red>بيخطر عبالكن<p-color-red>.
ضلكن معنا للآخر <p-color-red>كرمال خبركن<p-color-red> أكتر عن الانشطة يلي فيكن تمارسوها بشارع الحمرا.
غير طبعًا الاوتيلات المهمة الموجودة هون، وفيكن تحجزوا فيها بأسعار مقبولة بتترواح بين ٢٠ و ٥٠$ بالليلة متل أوتيل جفينور روتانا و أوتيل كراون بلازا لبيعتبروا من افضل اوتيلات لبنان و حصلو على تقييم كتير عالي على الخدمة و القيمة المقدمة مُقابل المصاري المدفوعة
و هلق وصلنا على <p-color-red>البارت<p-color-red> الاهم، شو فيكن تعملوا بشارع الحمرا يا ترى؟ كتير اشيا
و أوّلها لما تزوروا شارع الحمرا، لازم تعملوا جولة كاملة داخل هالشارع لتستكشفوا أجواءه الحيوية، وتستطلعوا عن قُرب أكتر على أهم المعالم السياحية والترفيهية الموجودة فيه.
ببلّش الشارع بصورة كبيرة للشحرورة صباح مرسومة بطول البناية كلها و بس تكملو لقدام رح يلفتلكن نظركن انو اغلب الجدران بهالشارع مرسموم عليها بألوان فرحة و بطريقة كتير حلوة بتعطي طاقة ايجابية للمارّين بهالشارع
تاني شي ممكن ينعمل بالحمرا هو أكيد shopping! بتنتشر على الميلتين من الطريق بشارع الحمرا عدد كبير من المحلات يلي بتبيع كلّ أنواع المُنتجات مثل التياب، الأحذية، الساعات، والإكسسوارات و غيرهن. و كمان ممكن تلاقوا عدد من المحلات تعتبر brand بلبنان متل h&m, adidas, nike, jack&jones, vero moda، max, Lc wakiki
وبتتميّز بجودة عالية و اسعار نوعاً ما رخيصة و خاصّة بعد التضخم الاقتصادي يلي صاب البلد، فصارت الاسعار مناسبة اكتر للسواح و <p-color-red>المغتربين<p-color-red> يلي بتعتبر قدرتهن الشرائية أفضل من اولاد البلد باعتبارهن حاملين العملة الصعبة يعني الدولار. بينما اللبنانيين يلي بعدهن بيقبضوا باللبناني فتوجهن اكتر عم يكون عالبالات و القطع المستعملة متل Eldorado، سوء عكاظ، خود و اعطي و غيرهن من المحلات يلي فتحت من جديد <p-color-red>كرمال<p-color-red> الاشخاص يلي حابين يشترو. brand مستعمل بأسعار ارخص من السوق
من هالمتاجر و المحلات بشارع الحمرا فيكن تشتروا كل شي بدكن ياه و كمان فيكن تشتروا هدايا تذكارية لرفقاتكن وقرايبينكن.
شارع الحمرا متل اي منطقة بلبنان تأثر بالازمة الاقتصادية، بس اجت الحلول الوسط كحل مؤقت للصمود و بلّشت هالمحلات تسكّر ابوابها عالساعة ٦ بالليل من بعد ما كانت تفتح ٢٤ ساعة
و مش بس هيك، فيكن تلاقوا بشارع الحمراء عدد كبير من <p-color-red>الكافيهات<p-color-red> الحلوة و المميزة متل روسّا، كاريبو، كافيه الحمرا وغيرهن كتير. و كمان بتلاقو كافيهات اجنبية متل starbucks, dunkin donuts وهنيك فيكن تقعدوا و تستمتعوا بكوب من مُشروبكن المُفضّل، انتوا وعم تتفرجوا على أجواء الشارع النابضة بالحياة.
هالشارع الي كان و بعدو ملتقى للمثقفين بيحتوي رغم ضيق مساحته ع اكتر من ٥ مكتبات منها مكتبة عياد، انطوان،بيسان، برزخ و غيرن بالاضافة لعدد من دور النشر متل دار الرافدين و العرب و غيرن كتير.
و لمّا بيضربكن الجوع بشارع الحمرا <p-color-red>ما تعطلوا هم<p-color-red>! لانو بهالشارع عندكن خيارات مطاعم كتيرة. تقريباً سعر الوجبة لشخص واحد ما يقارب 5 دولار.
فيكن تاكلوا اكل لبناني متل السودة، المسخّن، البطاطا الحرة، المتبل بتنجان، الحمص، الكبة الرقاقات، ورق عنب و شو ما ببيجي عبالكن من مطاعم لبنانية متل ام نزيه، ة مربوطة، مزيان و غيرهن من المطاعم لبعدها محافظة على التراث اللبناني القديم شكلاً و مضموناً.
أو فيكن تستمتعوا بالاكل الآسيوي بمطاعم موجودة اول شارع الحمرا متل sushi lovers, shopsticks, little bangkok,kampaii
أما اذا كان خياركن الوجبات السريعة او متل ما منسميهم هون بلبنان
fast food، فهون الخيارات كتيرة، لا تعد و لا تحصى متل roadster, crepeaway, deek duke, classic burger, sandwish nos , malek tawook, afandina، و طبعاً مطعم بربر يلي يعدّ من اقدم المطاعم بالحمرا و بتلاقو عندو كل شي..
و اكيد فيكن تلاقوا اكل ايطالي كمان متل الباستا و البيتزا او حتى المعجنات الايطالية.
و اذا حبيتو تتحلّو في crepe and more, dip & dip, chocolate bar
بيقدمو الشوكولا البلجيكي الأصلي.
شهيتكن؟ اي ما شفتو شي بعد!
و بعد ما خلصت، بنص الحمرا، في سنتر للألعاب الاكترونية و بتلاقوا فيه كمان صالة كبيرة للبولنغ.
و اذا كنتو من محبي الفن، فيكن تحضرو افلام عربية و عالمية من خلال السينما الموجودة بشارع الحمرا.
و اكيد ما مننسا مسرح مترو المدينة يلي شهد اجمل مسرحيات زياد الرحباني و رافقنا طيل فترة الحرب الاهلية لليوم.
وإذا حالفكن الحظ فيكن تحضرو بعض المهرجانات، الإحتفالات أو حتى المبادرات الفردية يلي بتنعمل بشارع الحمرا من وقت لتاني.
بالاضافة انو كل نهار احد بيتسكر الشارع قدام السيارات و بصير متاح بس للمشاة، لانو بهالنهار بيفتح سوء الاكل و العالم بتعرض فيه مونتها من عسل طبيعي، <p-color-red>لبنة مكعزلة<p-color-red>، زيتون اخضر، مكدوس، و مربى ع انواعو. بتقدروا تشترو <p-color-red>مراطبين<p-color-red> من هالمونة او فيكن كمان تشتروا مناقيش جبنة عالصاج او سندويشة لبنة بخبز التنور.
و طبعاً ما تقبلوا <p-color-red>تفلّوا<p-color-red> قبل ما تاخدوا صور تذكارية الكن بهالشارع الشهير بلبنان.
بتمنى تكونو استمتعتوا بالجولة معي بشارع الحمرا المميز ببيروت، و بانتظار زيارتكن قريباً!
